مدام تِوسو في النجف
مدام تِوسو –Madame Tussauds- وتنطق بعدم لفظ الدي والأس على النطق الفرنسي. هو الاسم المعروف لأشهر متاحف الشمع حول العالم. وقد قررت محافظة النجف انشاء متحف شمع لأشهر الشخصيات الثقافيه الاسلاميه.
شخصيا صرت شكوكي وأعتقد ماكو شغله يسووها أهل العمايم لوجه الله. لذلك من سمعت بهاي الشغله, الفار لعب بعبّي. شنو القصد وليش يصرفون على تماثيل شمع. شنو احنه ناقصين عمايم؟؟
هسه اشرحلكم شنو الفلم
وين المشكله؟
أولا هاي التماثيل حرام لو حلال؟ ليش قسم النحت بالفنون الجميله حرام ويسوون اصنام, وهاي التماثيل مو اصنام؟ افتونا مأجورين.
أريد اصير اليوم آية الله جراحستاني, واصدر فتوى اكول بيها, هاي اللي بالنجف نعم اصنام وهذيج لا, شلون؟
خلي تجي زايره من طهران وتشوف تمثال الخميني وشوفوا شراح تسوّي, إذا ماطاحت على مداسه تبوسه اني مو سرمد.
يابه اني كلشي ما أريد, بس خلي ينطوني تمثال سيد مقتدى, إذا ما لمّيت مليون دولار من النذوره بشهر كلشي ما افتهم.
والخمس مالكم ادفعه مقدما على اي بنك سويسري اسلامي. وإذا تريدوه فِيَش روليت بكازينو مونت كارلو, هم ماكو مانع.
خو اذا انطوني المتحف كله, يمكن أطلع كلدارية حضرة أمير المؤمنين كسر.
وأخلي الكوّام والكلداريه يجدّون بباب المتحف. ومو بعيد أخلي التماثيل تصدر فتاوي وأعزل الحوزه.
وحتى يمكن اسويهم حزب وادخل بيهم انتخابات برلمانيه واكيد راح يفوزون
على الاقل راح يكعدون بالبرلمان ومايغيبون, وكل فرق ماكو بينهم وبين النواب الحاليين. بالعكس يفيدون الشعب اكثر, لأن يجيبون وارد وما ياخذون رواتب, وما يحتاجون حمايه ولا سيارات مصفحه.
ونفس الشئ عود من يأمرهم رئيس الكتله صوتوا نعم, يصوتون نعم. أكثر من هاي ماكو.
فهمتوا الفلم اخوان, بير نفط جديد!!
عملية تجميل شرعيه
هذه قصه حقيقيه ليست من بنات الخيال وهناك شهود عليها, ولو ان زمن العجائب ولى, واصبح كل شئ ممكن حدوثه من طيران الفيله إلى الجاموس الناطق, عدا حصول العراقيين على حكومه نظيفه, هاي المعجزه ماراح تصير.
بطلة هذه القصه زوجة احد اعضاء امانة بغداد من محدثي النعمه, ومن تيار يمه نتلني الاوتي.
ذهبت هذه السيده الى لبنان, شايله علاكه دولارات - مو شقه أخوان, شايله خمسين الف دولار بعلاكه نايلون!!-, لأجراء عملية تجميل, لتزيل ما افسده الدهر, والاضرار الجانبيه لأكل القيمه والتمن.
وبسبب مطالبة ابو الفريخات* تحسين الخدمات !!وإزالة الحواجز الشحميه, لتسهيل الوصول الى المنطقه الخضراء!!
فوصفوا لها جراحا - لاتتهموني اني معليه- ذو شهرة وصيت.
فلما دخلت الخيمه, يبووووو. قصدي العياده واراد ان يفحصها,
قالت له بلسان فصيح, اوكف ولك جا هيه فالتون*, جا هيه كلمن إله. مَيّل غاد* ,لا أطِكك طراك أطيح ضروسك.
فذعر الطبيب وقال, شو مدام, شو صار؟ بدنا نعمل تست من شان الاوباراسيو -العمليه- .
فأجابت, ولك يلثول مايصير انكشف على غريب ولو ماعندي رييل –رجيجيل*- ماهدّيتك وانته احمراني تكول طماطايه.
الدكتور, وشو الحل مدام هيك مافيني اعمل شي.
المدام, تملج على بنتي متعه!!! -بنتها شابه عمرها عشرين سنه- !!!
الدكتور, شو يعني تملش ؟.
المدام, يعني تتزوجها متعه يلثول حتى تصير محرم علَيْ.
وهنا كاد الدكتور ان يفقد الوعي, فقال مش ممكن مدام انا مسيحي ومتجوز!!
فقالت مسيحي, مو مشكله, المهم مو سني!! تتجوزها وغصبا عليك واحنا ندفعلك مهر!!
فأجريت العمليه واصبحت بجمال ورشاقة وغنج سلحفاة حوله.
ومبروك للعروسين, وهنياله اللي صار دكتور.
شلون ما اشوف هذا راح يوكعلنه دك….. عمليات تجميل!!
*الفريخات تعني الاطفال بلهجة اهل الجنوب
*رجيجيل, مصغر رجل اي زوج
* فالتون تعني بدون حواجز او عوائق
*مَيّل غاد: ابتعد عني